Tag Archives: Serie

Fire og Carrington-katastrofen

Dei fleste forfattarar skriv meir enn ei bok, og denne gongen er det bok nummer to i to seriar som blir omtalt her.

Carrington-katastrofen

I januar las og likte eg boka Lasarusfenomenet, den første boka i serien «Den 4. parallell» av Kjetil Johnsen. No har eg lest oppfølgaren: «Carrington-katastrofen«. Emma og Caine finn seg sjølv i ei ny verd, men det er ikkje Caine si heimverd. I denne verda blir Caine sett i fengsel, mistenkt for å ha skada Emma. Emma prøver å finne ein måte å få han fri, samtidig som ho prøver å finne ut meir om verda dei er i. Vi får også vite meir om Caine sin bakgrunn og verda han kjem frå, ei verd der ein Carrington-katastrofe har fått samfunnet til å bryte saman og borgarkrig til å bryte ut.

Som den første boka i serien er også denne veldig spennande. Eg syns imidlertid ikkje at den er like god som førsteboka, så det blir karakter 4.

Dette syns Kulturspeilet om boka.

————–

Fire

I fjor kom Kristin Cashore ut med boka Graceling som foregår i ei verd der nokre menneske er fødd med spesielle evner, såkalla «gåver».  Eg likte den veldig godt og har no lest Kristin Cashore si neste bok, Fire.

Boka finn stad i same verda som den forrige boka, men i landet The Dells finst det ingen Gracelings. Det dei derimot har er monster. Monster er dyr eller menneske med overjordisk skjønnhet, magnetisk tiltrekningskraft og evner til å påvirke folk sine tankar og følelsar. Små monster som gnagarar og kattar får lov til å leve, men store monster er farlige og blir jakta på. Dei farlegaste monstra av alle er menneskemonster og den siste av dei er Fire. Far hennar var eit monster som brukte evnene sine til å få makt og innflytelse, men Fire nektar å misbruke evnene sine på denne måten. Resultatet er at ho alltid er i fare og har valgt å leve isolert og beskytta i den nordlege delen av kongeriket.  Så begynnar ting å skje og Fire må reise til hovudstaden og hoffet for å hjelpe til å beskytte landet.

I tid finn boka stad før Graceling og ein person frå denne boka spelar ein stor rolle i Graceling, men eg ville uansett lest Graceling først sidan avsløringar i Fire vil øydellege litt av spenninga i Graceling.

Cashore gjer ein del ting i sine bøker som er uvanlig i fantasylitteratur. Det er sjeldan at eg har lest at kvinnelege hovudpersonar menstruerer, men i denne boka er det viktig sidan Fire er ekstra utsett for angrep frå andre monster når ho har mensen. Det er og tydeleg at Fire lever i eit brutalt samfunn der m.a. valdtekt i krigssituasjonar  og menn med makt som utnyttar kvinner med mindre makt er svært utbreidd. Samtidig er boka fylt med folk som er glade i kvarandre og lojale ovenfor kvarandre. Dette er tredimensjonale personar, ikkje papirdokker.

Det er vel ingen overraskelse at boka får ein 5’ar hjå meg.

Dette syns andre om boka:

The Ask and The Answer

The Ask and The Answer av Patrick Ness er andre boka i trilogien Chaos Walking. Førsteboka, The Knife of Never Letting Go, likte eg veldig godt.  I The Ask and The Answer held historien om Todd og Viola fram.

Eg vil ikkje skrive stort om innhaldet, fordi det vil øydelegge for lesinga av første boka i serien. Men den er kjempespennande, akkurat som The Knife of Never Letting Go.

Eg likte ikkje denne boka like godt som den forrige, men så likte eg også den veldig godt.  Todd og Viola er kompliserte personar som eg blir meir og meir glad i, og «skurkane» framstår heller ikkje som enkle og eindimensjonale. Det er fascinerande å sjå korleis «noise» (dei høyrbare tankane) både kan avsløre deg, skjule sanning og gje fiendar middel til å manipulere deg. Det blir i løpet av boka også meir og meir klart at dei innfødde, Spackle, absolutt er ein faktor som må reknast med når planeten si framtid skal avgjerast.

Eg har store forhåpningar til siste boka i trilogien «Monsters of Men». Den kjem ut ein eller annan gong i 2010.

Dette syns andre om boka:

Opp i flammer / Catching fire

Opp i flammer av Suzanne Collins er oppfølgjaren til Dødslekene som eg las i februar, og den er like god.

«Spoiler alert» for alle som ikkje har lest Dødslekene.

To personar overlevde dei 74. Dødslekene – Katniss og Peeta. Noko slikt har aldri skjedd før og det er derfor eit opprør mot Capitol og ei oppmuntring til alle opprørslystne folk i alle 12 distrikta i Panem.

Vel heime i Distrikt 12 fryktar Katniss kva presidenten og hans folk kan finne på å gjere for å hemne seg på henne. Ho fryktar for livet til både familie og venner, og frykta blir ikkje mindre når ho forstår at ho er blitt eit opprørssymbol for heile landet.

Ho treff og på to flyktningar i skogen. Dei er på leiting etter Distrikt 13 som blei øydelagt for mange år sidan. Ryktet seier at Distrikt 13 har bygd seg opp igjen og no er ei eiga makt utanfor Panem sin kontroll.I mellomtida strammar Capitol grepet om Distrikt 12 og dei andre distrikta i Panem. Katniss får klar beskjed frå presidenten om å dempe opprørstronga som ulmar i landet og å overbevise han om at ho kun er ei forelska ungjente utan ein opprørsk tanke i hovudet. Dersom ikkje….

Når utvelginga av deltakarar til dei 75. Dødslekene blir annonsert forstår Katniss at ho hadde god grunn til å frykte konsekvensane av at ho klarte å få både seg og Peeta levande ut frå dei forrige Dødslekene.

Det er alltid litt nifst med oppfølgarar, men Suzanne Collins har greid jobben til fulle.  Opp i flammer er like velskriven og spennande som Dødslekene.  Eg kan nesten ikkje vente på den neste boka i serien.

På Askøy vgs. har vi både den engelske og den norske utgåva av begge bøkene.

Dette meiner andre om Catching Fire
Karin’s Book Nook
Persnickety Snark
Time
Linus’s Blanket

Suzanne Collins si heimeside

Fullmetal Alchemist

Fullmetal Alchemist er ein mangaserie om alkymistbrødrene Edward og Alphonse Eldric og handlar om alt dei kjem ut for mens dei leitar etter dei vises stein.

Biblioteket på Askøy vgs. har i skrivande stund dei 4 første hefta i denne serien og kjem til å kjøpe inn resten etterkvart.

Foreløpig har eg berre fått lest det første heftet i serien. Eg likte det godt. Masse spenning og action, og som vanleg gjekk det fort å bli vant til å lese i «mangaretninga». No tar eg med meg dei neste tre hefta i serien heim og ser om eg får lest dei i helga. Hefte nr.1 er å finne i teikneseriehylla på biblioteket.

Wikipedia har ein artikkel for dei som vil lese litt meir om Fullmetal Alchemist.

Løgneren Locke Lamora

Løgneren Locke LamoraÅ hjelpe meg…. Løgneren Locke Lamora er Scott Lynch si første bok, men det skulle ein ikkje tru.

Locke Lamora blir foreldrelaus som ganske liten og hamnar i flokken til Tjuvmakeren. På dei første sidene i boka er Tjuvmakeren i god gang med å prøve å selge Locke til Den Øyeløse Presten, av den enkle grunn at dersom han ikkje får solgt han så må han drepe han. Guten har rett og slett stjåle for mykje, og frå dei feile folka.

Som vaksen er Locke Lamora ein gentlemanstjuv som saman med kompisane sine stjel frå dei rike i byen Camorr. Men ting byrjar å skje blant forbrytarane i Comarr, og til tider er kanskje Locke for smart for sitt eige beste.

Eg likte denne boka veldig godt, den er ei original og spennande forteljing om forbrytarar, vennskap og magi. Eg gler meg svært til fortsetjinga av serien «De Veloppdragne Kjøterne» og sit igjen med mange spørsmål som eg håpar å få svar på i løpet av serein. ASVbib har boka på både norsk «Løgneren Locke Lamora» og engelsk «The Lies of Locke Lamora«.

Kva andre seier om boka:
Det fantastiske hjørnet – klikk på fanekortet «Månedens spennende nykommer»
Pat’s Fantasy Hotlist
Realms of speculative fiction

Teikneseriar

ASVbib har etterkvart ei ganske omfattande teikneseriesamling. Som så mange andre har eg sjølvsagt lest Pondus og Nemi, men det er også alt for masse i desse hyllene som eg ikkje har lest. Så no har eg bestemt meg for å gjere meg litt meir kjent med teikneserieuniverset. Under finn du ein presentasjon av det eg har lest siste vekene, og her finn du alt vi har på biblioteket.

Bone handlar om Fone Bone og fetrane hans – den grådige forretningsmannen Phoncible P. Bone og den hyggelige og velmeinande Smiley. På grunn av Phoncible sin grådighet må dei flykte frå heimbyen Boneville og hamnar i den mystiske dalen. Dette er starten på mange eventyr. Bone ser ved første blikk ut som ein barneserie, men det er vel så mykje ein vaksenserie der den vekslar  mellom humor og alvor, komedie og spenning. ASVbib har dei to bøkene som har utgitt på norsk og vil kjøpe inn fleire så snart dei kjem ut. Serien har også si eiga heimeside på Internett. Eg gler meg alt til neste bok. Veldig bra.

Death Note er ein japansk mangaserie om den  toppstudenten Light Yagami. Han er 17 år og kjedar vettet av seg. Ein dag finn han ei notisbok som Shinigamien (dødsguden) Ryuk har etterlatt i menneska si verd. Alle som får namnet sitt skrive i denne boka vil dø, og Light bestemmer seg for å bruke Death Note til å drepe alle onde menneske i heile verda. Politi i heile verda anar uråd når forbrytarar dør ein etter ein, og dei sender den mystiske detektiven L etter mordaren. ASVbib har p.d. dei 6 første binda i serien på norsk og kjøper nye når dei kjem ut.
Eg har til no berre lest bind 1 i serien, og likar den veldig godt. Det tok litt tid å bli vant til å lese frå høgre mot venstre, men så snart eg fekk taket på det så koste eg meg veldig.  Eg kjem nok til å lese vidare.

Palestina er Joe Sacco si fantastiske beretning frå eit tomånaders opphald på Vestbredden og Gaza under den første intifadaen i 1991-92. Han tar for seg konflikta i Midtøsten, okkupasjonen og håpløysa menneska der føler. Den vanskelege konflikta blir skildra gjennom mange forskjellige ansikt og stemmer, og forfattaren sine eigne tankar og følelsar får også plass.
Teikneserieformen formidlar dette vanskelege temaet på ein måte som knapt noko anna medium kan. Dette er ei aldeles fabelaktig bok. Les, les, les!

I Persepolis fortel Marjane Satrapi om sin oppvekst og ungdom i Iran og Østerrike. Teheran 1978. Marjane er 8 år og dotter av kultiverte og velutdanna foreldre som håpar på eit nytt og meir demokratisk Iran. Men det blir fort klart at det ikkje går slik dei ønskjer når den Islamske Republikk og alle dens nidkjære voktarar overtar styringa. Nokre få år etterpå bryt krigen mot Irak ut. Marjane sine foreldre tar til slutt den tunge beslutninga at dei vil sende henne på skule i Wien. Der venter eit heilt anna liv, men er det eit betre liv? Det er vanskeleg å vekse opp langt frå familie og kulturen ein kjenner, og kva med å vende heim igjen…
Dette er ei veldig god grafisk oppvekstforteljing og det er ikkje rart at Persepolis er blitt filmatiser . ASVbib har sjølvsagt filmen og.

Husfred av Alison Bechdel er også ein sterk oppveksthistorie.
Alison Bechdel førte dagbok som barn, og glimt frå denne dagboka dukkar opp gjennom heile forteljinga.  I sentrum av forteljinga ligg hennar forhold til foreldra, og då spesielt faren.  Han er på same tid både tilstades og fråværande, ein mann med mange skjulte sider. Fasaden er engelsklæraren , tredje generasjons eigar av det familieeigde gravferdsbyrået og mannen som er glødande interessert i å pusse opp gamle hus. Men han er også skjult homofil, humørsjuk og uberekneleg. Den grafiske romanen tar for seg tema som homofili og sjølvmord, og Alison Bechdel brukar verdslitteraturen aktivt for å forstå seg sjølv og familien sin. Elles så har Alison Bechdel har i mange år teikna lesbeteikneserien Dykes to watch out for som også er veldig bra.
ASVbib har også Husfred på engelsk (Fun Home)

Piray er Karine Haaland sine fantastiske striper der ho godlynt mobbar alt og alle. Ingen går fri, og ingen er heilage – Piray sparkar i alle retningar og viser oss kor absurd verda kan vere. Serien har ingen hovudperson, men det er ein del figurar som går igjen.
Kostelege striper. For meg er dei perfekte på dagar då eg generelt føler meg litt amper.

I Eon presenterer Lars Lauvik oss for sitt spinnville persongalleri: Gud (pensjonert), maurslukaren Tetra (oppvaksen i ein telefonselgarkoloni på Jan Mayen), prøvekaninen Gonzales, Dogdraugen, m.fl. Serien kommenterer på sitt absurde vis aktuelle ting i samtida, eller det som forfattaren måtte ha lyst til å kommentere akkurat då. Gjestar i serien inkluderer m.a. Kjell Magne Bondevik, Terje Søviknes og Anne Holt. Lars Lauvik står også bak Wildlife og Oppgulp. Lars Lauvik er ein av mine favorittserieskaparar, og eg ler like godt kvar gong.

Vi har sjølvsagt Pondus og Nemi og.

Nokre teikneserielenker
Raptus – Bergen internasjonale tegneseriefestival
Bergen off. bibliotek si teikneserieside
Serienett – norsk nettidskrift om teikneseriar
Tegneserier en må lese fordi sånn er det bare – Blogg

Dødslekene / The Hunger Games

Eg var først motstrevande til å lese ”Dødslekene” (The Hunger Games) av Suzanne Collins, eg hadde lest litt på ryggteksten og var rett og slett redd for at den skulle vere for fæl. Men fleire av dei andre vgs-bibliotekarane i Hordaland fortalte meg at den var utruleg bra, og at eg berre måtte lese den. Og det gjorde eg….

Dødslekene finn stad i landet Panem som er det som er igjen av USA etter at krig og naturkatastrofar har øydelagt landet. Hovudstaden Capitol har all makt over resten av landet som er delt inn i 12 distrikt. Det var tidlegare 13 distrikt, men Distrikt 13 blei totalt øydelagt etter eit landsomfattande opprør ca.50 år før handlinga i boka finn stad. Som straff for dette opprøret blir kvart år to ungdommar, ein gut og ei jente, frå kvart distrikt tatt ut til å delta i ”Dødslekene” – eit realityshow der deltakarane blir plassert på ein stor utandørs arena der dei må kjempe til døden mens heile landet ser på. Den siste som står igjen er vinnaren. Vinnaren er sikra eit liv i luksus, og vinnaren sitt distrikt får nok mat til alle sine Dødslekeneinnbyggarar fram til neste års dødsleikar.

Vår hovudperson er jenta Katniss frå det lutfattige Distrikt 12. Som hjelpar i førebuinga får ho og guten Peeta den einaste tidlegare i vinnaren frå Distrikt 12. Han er ein bitter og alkoholisert mann som er tydeleg merka av det han hadde vore med på for mange år sidan. Deltakarane blir ført til Capitol der dei blir styla opp og er stjerner i eit stor medieshow – noko som for både Katniss og oss lesarar er ganske grotesk når ein tenker på kva leikane eigentleg går ut på. Katniss er ei tøff jente som er vant til å passe på mora og vetlesøstra si ved ulovlig jakt. Men dette er ingen garanti for å overleve dødsleikane.

Kollegaene mine hadde rett: ”Dødslekene” er tankevekkande, samfunnskritisk, original – og berre heilt FABELAKTIG.

Biblioteket på Askøy vgs. har den på både norsk og engelsk.

”Dødslekene” er den første i ein planlagt triologi: Bok nr. 2 ”Catching Fire” er planlagt utgitt 1.sept.2009 – og vi kjøper den så snart den er tilgjengeleg, både på norsk og engelsk.